ISLOM KARIMOV NOMIDAGI TDTU OLMALIQ  FILIALI TARIXI

   Navoiy davlat konchilik institutining Olmaliq kon-metallurgiya  fakulteti o‘rnida tashkil etilgan Islom Karimov nomidagi Toshkent davlat texnika universiteti Olmaliq filialining ham o‘z shonli tarixi bor. Bugun barcha sohalarda amalga oshirilayotgan taraqqiyparvar islohotlar oliy ta’lim tizimida ham o‘z bo‘y-bastini ko‘rsatmoqda. 

   O‘tgan asrning 50-yillarida O‘zbekistonda yirik foydali qazilma konlari aniqlanib, ularni qazib olish, boyitish fabrikalari hamda metallurgiya zavodlarining qurilishi rejalashtirilgan bo‘lib,  ushbu rejani amalga oshirish ishlari 1960 yillarda boshlab yuborildi. Jumladan, Olmaliq kon-metallurgiya kombinati, “O‘zbekoltin” birlashmasiga qarashli CHodak, Angren, Marjonbuloq konlari va rudalarini boyitish fabrikalari, keyinroq esa Navoiy kon-metallurgiya kombinatlari tashkil topdi. Bu davrda Bekobod metallurgiya zavodi, CHirchiq o‘tga chidamli va qiyin eruvchi metallar (volfram va molibden) ishlab chiqarishga mo‘ljallangan kombinat faoliyat ko‘rsatib kelayotgan edi. Ushbu konlar, fabrikalar, zavodlarda ishlash uchun mutaxassislar – injener, konchilar, boyituvchilar hamda metallurglar tayyorlash davr talabiga aylangandi. Ushbu vazifa bilan Toshkent politexnika instituti (hozirgi Toshkent davlat texnika universiteti)  Konchilik fakulteti shug‘ullanardi. 1961 yili Olmaliq shahrida Olmaliq kon-metallurgiya fakutetida kechki ta’lim tizimida ishlab chiqarishdan ajralmagan holda talabalar tahsil ola boshladi.

   Keyinchalik Oliy o‘quv yurtlari ishlab chiqarish korxonalariga yaqin hududlarga ko‘chirish maqsadida Toshkent politexnika instituti tarkibidagi kunduzgi kon-metallurgiya fakulteti 1963 yilning sentyabrida Olmaliq shahriga ko‘chirildi.  1967 yilning sentyabrida esa Olmaliq kon-metallurgiya fakultetining kunduzgi bo‘limi qayta yana Toshkentga ko‘chirildi. Olmaliq shahrida esa ToshPIning kechki  “Olmaliq kon-metallurgiya” fakulteti tashkil qilinib, kechki bo‘limda o‘qiydigan talabalar qoldirildi. Mutaxassislik kafedralari  “Rangli metallar metallurgiyasi”, “ Foydali qazilmalarni ochiq usulda qazib olish texnologiyasi” va boshqa barcha kafedralar  Toshkentdagi Kon-metallurgiya fakultetining mutaxassislik kafedralari tasarrufiga o‘tkazildi. Kechki Olmaliq kon-metallurgiya fakulteti tarkibida mustaqil kafedra sifatida “Foydali qazilmalarni boyitish”, “Umummuhandislik”, “CHet tillar” hamda “Sanoat qurilish”  kafedralari tashkil qilingan.

   Kechki Olmaliq fakulteti 1967 yildan 1995 yilgacha faoliyat ko‘rsatadi. 1995 yildan Toshkent oliy o‘quv yurtlarining boshqa shahar va viloyatlaridagi fakultetlari va filiallari tugatiladi.  SHu jumladan Olmaliq fakulteti ham.

   2001 yilda esa Navoiy davlat konchilik institutining kunduzgi Olmaliq kon-metallurgiya fakulteti ochildi. Fakultetda “Konchilik elektromexanikasi”, “Ijtimoiy fanlar” kafedralari ish boshlab, “Konchilik ishi”, “Konchilik elektromexanikasi”, “Metallurgiya”  sohalarida kadrlar tayyorlandi.

   Prezidentimiz SHavkat Mirziyoevning tashabbuslari bilan  2017 yil 27 iyulidagi “Toshkent viloyatida sanoat-ishlab chiqarish sohasi uchun muhandis-texnik kadrlar tayyorlash tizimini takomillashtirish chora-tadbirlari to‘g‘risida”gi Qarorlariga muvofiq Islom Karimov nomidagi Toshkent davlat texnika universiteti Olmaliq filiali tashkil etildi. Ushbu qarorga muvofiq filialda “Konchilik ishi va metallurgiya”, “Energetika va mashinasozlik” fakultetlari faoliyat boshladi. “Konchilik ishi va metallurgiya” fakulteti “Konchilik ishi”, “Metallurgiya”, “Umumkasbiy fanlar” kafedralarini, Energetika va mashinasozlik  fakulteti esa “Elektr texnikasi, elektr mexanikasi va elektr texnologiyalari”, “Kimyoviy texnologiya”, “Mashinasozlik texnologiyasi” kafedralarini o‘z ichiga oladi.

   Ayni vaqtda kunduzgi bo‘limda Mashinasozlik texnologiyalari, mashinasozlik ishlab chiqarilishini jihozlash va avtomatlashtirish, Konchilik ishi, Metallurgiya, Elektr texnikasi, elektr mexanikasi va elektr texnologiyalari kabi bakalavriat ta’lim yo‘nalishlari bo‘yicha mutaxassislar tayyorlanmoqda. Joriy o‘quv yilidan boshlab Konchilik elektr mexanikasi hamda Texnologik mashinalar va jihozlar nomli yangi yo‘nalishlar ochildi. SHuningdek, oliygohimizda kechki va maxsus sirtqi bo‘limlar ham tashkil etilib, ushbu bo‘limlarda 400 nafarga yaqin talaba tahsil olmoqda. Filialimizning kunduzgi va kechki bo‘limlariga abiturentlarning hujjatlari umumiy belgilangan tartibda qabul qilinadi. Maxsus sirtqi bo‘limga esa kamida uch yillik amaliy ish staji hamda “Olmaliq KMK” AJ, “Navoyi KMK” DK, “O‘zbekiston metallurgiya kombinati” AJ, “O‘zbekko‘mir” AJ  O‘zbekiston Respublikasi Davlat geologiya va meneral resurslar qo‘mitasining tavsiyanomalari talab etiladi.

   Albatta, bugungi kun talabidagi kadrlar tayyorlashni zamonaviy labaratoriya jihozlarisiz tasavvur etib bo‘lmaydi. Mazkur masalada Olmaliq filiali uchun xarid qilinishi yuzasidan 6 nomdagi jumladan Metallurgiya, elektrotexnika va elektronika asoslari, Kimyoviy texnologiya, Gelogiya, gidrologiya va gidrogelogiya, Mashinasozlik hamda Favqulodda holatlar xavfsizlgi, mehnat muhofazasi va hayot faoliyati xavfsizligi sohalariga oid o‘quv-laboratoriyalarini belgilangan muddatlar doirasida amalga oshirish rejalashtirilgan.

   Filialda faoliyat olib borayotgan barcha professor-o‘qituvchilarning o‘z ilmiy-tadqiqot yo‘nalishlari mavjud bo‘lib, ular belgilangan muddatlarda ilmiy maqola, o‘quv-uslubiy qo‘llanma va darsliklarni chop etib kelmoqda. SHuningdek, tadqiqot doirasidagi  dissertatsiya himoyalarini muvaffaqiyatli o‘tkazishmoqda. O‘tgan yilda ikki nafar professor-o‘qituvchi o‘z dissertatsiyalarini ana shunday muvaffaqiyat bilan himoya qilib, fan doktori ilmiy darajalariga ega bo‘lishdi. Joriy yilda esa yana to‘rt nafar professor o‘qituvchilarimizning ilmiy-tadqiqot ishlari oxiriga etkazilib, dissertatsiya himoyalarini o‘tkazish asosiy maqsadimiz sifatida belgilangan. Bu doirada o‘z ilmiy tadqiqot ishlarini olib borayotgan bir guruh yosh iste’dodli professor –o‘qituvchilarimizdan – Olmos Boltaev, Obid Xasanov, Vazira Ahmedova, Nazira Madusmonova, Rusana Sinjapova, Jahongir Turdibaevlarni misol keltirish mumkin.  Ularning har biri  talaba-yoshlarning kamol topishi, jamiyatda munosib o‘rin egallashida bor bilim va tajribasini o‘rgatib, ma’nan boy avlodlar bo‘lib ta’lim-tarbiya olishlarida beqiyos hissa qo‘shib kelmoqda. Bilamizki, ta’lim-tarbiya har bir davlatning nafaqat bugunida, balki ertasida ham muhim masala sanaladi. SHu boisdan, talaba yoshlarimizning dunyoqarashini yuksaltirish, huquqiy savodxonligini oshirish, Respublikamizda olib borilayotgan siyosiy, huquqiy, ijtimoiy va iqtisodiy sohalarda amalga oshirilayotgan islohotlarning mazmun-mohiyatini to‘laqonli tushuntirish, Vatanga muhabbat ruhida tarbiyalash, ular o‘rtasida huquqbuzarlik, jinoyatchilik, diniy ekstremistik oqimlar, missionerlik kabi illatlarga qarshi kurashish, o‘qish va darsdan bo‘sh vaqtlarini samarali tashkil etish professor-o‘qituvchilarimizning doimiy e’tiboridadir.