Kuni kecha “Metallurg” madaniyat saroyida 2024-2025 o‘quv yilida TDTU Olmaliq filialiga o‘qishga qabul qilinib, 6000 ga yaqin talabalar safini to‘ldirgan 1-bosqich talabalarining “Talabalik qasamyodi” tadbiri bo‘lib o‘tdi. Dastur avvalida filialning eng faol, ijodkor bitiruvchi bosqich talabalarining vatanparvarlik ruhiyati singdirilgan badiiy chiqishlari barchani hayajonga soldi. Energetika va mashinasozlik fakultetining 1-bosqich talabalari ijrosidagi “Jadidlar o‘lmagay” nomli sahna ko‘rinishida mazmun-mohiyati bilan ma’rifat, ilm-fan boqiy ekanligi tarannum etildi. Konchilik ishi hamda Metallurgiya va kimyoviy texnologiyalar fakultetlarining xushovoz talabalari go‘zal qo‘shiqlarni hadya etdilar.

Filialda tashkil etilgan “Qalqon” guruhi” a’zolari o‘zlarining marsh qo‘shig‘i bilan tadbirga yanada ko‘tarinki ruh baxsh etdilar. Ramziy talabalik qasamyodini keltirgan 1-bosqich talabalariga talabalik guvohnomalari topshirildi. Shuningdek, filial “Turon” sport klubi tomonidan sport musobaqalarida g‘olib bo‘lgan talabalarga esdalik sovg‘alari topshirildi. Respublika oliy ta’lim muassasalari talabalari o‘rtasida o‘tkazilgan jismoniy tayyorgarlik darajasi sport sinovlarida qatnashib, eng yuqori natijalarni qo‘lga kiritgan talabalar Toshkent viloyati Sport boshqarmasining maxsus sovg‘alari bilan taqdirlandilar.

Talaba yoshlarning yuksak uyushqoqligi bilan tashkil etilgan tadbir barcha ishtirokchilar qalbida yoshlik sururi, ona Vatanga muhabbat tuyg‘usi, ijod zavqini uyg‘otdi.

O‘xshash postlar