“Eng yaxshi o‘quv-uslubiy qo‘llanma” respublika tanlovi

O‘zbekiston Respublikasi Prezidentining PF–16-son Farmoni ijrosi doirasida, Ta’limni rivojlantirish respublika ilmiy-metodik markazi tomonidan “Taʼlim ishtirokchilarini psixologik qo‘llab-quvvatlash bo‘yicha eng yaxshi o‘quv-uslubiy qo‘llanma” respublika tanlovi e’lon qilinadi.

Tanlovning maqsadi – ilg‘or g‘oyalar va innovatsion yondashuvlarga ega bo‘lgan iqtidorli psixolog va mutaxassislarni aniqlash, ularning faoliyatini qo‘llab- quvvatlash, taʼlim ishtirokchilarini psixologik qo‘llab-quvvatlashga doir sifatli va samarali ishlanmalarni amaliyotga joriy etishga va ommalashtirishga qaratilgan.

Tanlovga ishlanmalar elektron formatda raqamlitalim.trm.uz/psychology platformasi orqali 2025-yilning 10-sentabrigacha qabul qilinadi.

Oʻquv-uslubiy qo‘llanmalar tanlovga quyidagi hujjatlar bilan taqdim etiladi:
* tanlovda ishtirok etish uchun tanlov komissiyasi nomiga ariza (paltformada keltirilgan namuna asosida);
* muallif/tuzuvchilar haqidagi ma’lumot (F.I.Sh., ish joyi, lavozimi, ilmiy darajasi, bog‘lanish uchun telefon raqami);
* o‘quv-uslubiy qo‘llanma nomi;
* o‘quv-uslubiy qo‘llanmaning qisqacha mazmuni (annotatsiya);
* oʻquv-uslubiy qo‘llanmaning kitob ko‘rinishidagi fayli (PDF);
* o‘quv-uslubiy qo‘llanmaning ilmiy yoki ta’lim tashkilotlarining kengash yig‘ilishi muhokamasidan o‘tganligi to‘g‘risidagi bayonnomadan ko‘chirma;
* o‘quv-uslubiy qo‘llanmaga soha mutaxassislaridan ikkita taqriz (PDF).

Tanlovda yaratilganiga ikki yildan oshmagan o‘quv-uslubiy qo‘llanmalar qabul qilinadi. Ikki yoki undan ortiq bir xil mazmun va shakldagi, shuningdek, ko‘chirilgan (plagiat – originallik darajasi 70 foizdan past bo‘lgan) ishlanmalar ko‘rib chiqilmaydi.

Eng yaxshi oʻquv-uslubiy qo‘llanmaga quyidagi talablar qo‘yiladi:
– aniq, qiziqarli va maqsadli auditoriyaga (yosh guruhi, malaka darajasi va boshqalar) mos boʻlishi;
– tanlovning maqsad va vazifalariga mos kelishi;
– mavzu psixologiya fanining zamonaviy yutuqlari va nazariyalariga asoslanishi;
– keltirilgan ma’lumotlar ishonchli manbalardan olinishi va havolalarning berilishi (foydalanilgan adabiyotlar va manbalar);
– ilmiy tushunchalarning aniq va toʻgʻri ifodalanishi;
– ilmiy yoki murakkab tushunchalar sodda va tushunarli tilda izohlanishi;
– misollar, analogiyalar va topshiriqlar real hayotiy vaziyatlar yordamidф tushuntirilishi;
– ilmiy faktlar, tadqiqot natijalari va nazariy yondashuvlar asosida yoritilishi;
– har bir bo‘limda aniq mavzularning yoritilishi, o‘zaro bog‘liqlikning bo‘lishi;
– kundalik hayotda uchraydigan turli muammolarga yechim topishga yoʻnaltiradigan loyihalar va shunga oʻxshash amaliy tadqiqotlarning mavjud boʻlishi;
– psixologik terminlarning to‘g‘ri va izchil qo‘llanilishi;
– misollar, keyslar, topshiriqlar va mashqlar bilan boyitilgan bo‘lishi;
– har bir mavzudan keyin tafakkurni rivojlantiruvchi savollar va topshiriqlar berilishi.

Tanlovga taqdim etilgan oʻquv-uslubiy qo‘llanmalar quyidagi shakliy- texnik talablarga mos bo‘lishi kerak:
– eng kam hajmi 64 betdan iborat boʻlishi;
– annotatsiya 6-8 ta gapdan oshmasligi;
– kalit soʻzlar (indeksatsiya uchun) 8-12 soʻzdan iborat boʻlishi;
– qo‘lyozma tahriri 1,5 interval, Times New Roman 14 shriftda (matn yuqoridan – 20 mm, pastdan – 20 mm, chapdan – 30 mm, o‘ngdan – 15 mm li hoshiyalar oralig‘iga joylashtirilishi; betlar pastki qism markazida, ketma-ketlik saqlangan holda raqamlanishi) boʻlishi;
– jadvallarni “Microcoft Word”ning “tablitsa” funksiyasi orqali kiritish;
– ilovalar hajmi cheklanmagan, lekin ular matnga mos kelishi (matnda ularga havolalar berilishi);
– boʻlimlar va mavzular aniq ajratilgan boʻlishi;
– matnni xotirada saqlashni osonlashtirish, mavzulardagi ixcham chizmalar, turli tasviriy ifodalar, jadval, infografika hamda rasmlar bilan muvofiq tarzda taʼminlanishi;
– muhim maʻlumotlar qalin shrift, rangli fon yoki ramkalar bilan ajratilgan boʻlishi kerak.

Tanlovga taqdim etilgan oʻquv-uslubiy qo‘llanmalar joriy yilning 30-sentabrigacha belgilangan baholash mezonlari asosida 100 ballik tizimda baholanadi va e’lon qilinadi.Tanlovda g‘olib deb opilgan mualliflarning oʻquv-uslubiy qo‘llanmalari ommalashtirish uchun mazkur platformada keltirilgan ommaviy oferta asosida Taʼlimni rivojlantirish respublika ilmiy-metodik markazining rasmiy veb-saytlari va ijtimoiy tarmoqlardagi sahifalariga joylashtiriladi.

Tashkiliy qo‘mita qarori bilan g‘olib deb topilgan ishtirokchilar maxsus diplom va qimmatbaho sovg‘alar, shuningdek, nominatsiyalar bo‘yicha g‘olib deb topilgan ishtirokchilar esdalik sovg‘alari bilan taqdirlanadilar.